चैत १९ (एएफपी)- लियोनेल मेसीले गोल गर्ने अर्को कीर्तिमान बनाएपनि शनिबार शीर्ष टोली बार्सिलोना स्पेनिस ला लिगाको खेलमा सेल्टा भिगोसँग २-२ को बराबरीमा रोकिएको छ। पहिलो रोजाइका थुप्रै खेलाडीविना मैदान उत्रिएको बार्सिलोनाविरुद्ध सेल्टाका नेट्सो इन्साले मध्यान्तर हुन सात मिनेट बाँकी रहँदा गोल गर्दै अग्रता दिलाएका थिए। पाँच मिनेटपछि क्रिस्टियन टेलोले बराबरी गोल गरेपछि मेसीले ७३ औं मिनेटमा बार्सिलोनालाई अग्रता दिलाएका थिए। तर समय सकिन दुई मिनेट बाँकी रहँदा बोर्जा औबिनाले बराबरी गोल गरे।विश्व वर्ष खेलाडी मेसीले गरेको यो जारी सिजनको ४३औं लिग गोल हो। यही गोलमार्फत उनी लगातार १९ औं खेलमा गोल गर्दै स्पेनिस ला लिगाका सबै प्रतिद्वन्द्वीविरुद्ध एकै चरणमा गोल गर्ने पहिलो खेलाडीका रुपमा कीर्तिमान बनाउन सफल भए।
रियाल मड्रिडले रियाल जारागोजासँग १-१ को बराबरीमा चित्त बुझाएपछि बार्सिलोना अंकतालिकाको शीर्ष स्थानमा १३ अंकको अग्रता कायम राख्न सफल भयो। तर, बार्सिलोनाका सहायक प्रशिक्षक जोर्डी रोउराले खेलमा ध्यान केन्द्रित गर्न नसक्दा टोली विजयविमुख हुनुपरेको बताए। 'म कसैको व्यक्तिगत गल्ती औल्याउन चाहन्न। अन्तिम समयमा हामीले संगठित मेहनत गरेनौं,' रोउराले भने।
दोस्रो स्थानको रियालले बार्सिलोनाको बराबरीमा फाइदा उठाउन सकेन। रोडरीको गोलमा जारागोजाले छैटौं मिनेटमा अग्रता लिएपनि क्रिस्टियानो रोनाल्डोले मध्यान्तर हुन ८ मिनेट बाँकी रहँदा रियालका लागि बराबरी गोल गरेका थिए। स्पेनिस ला लिगामा शनिबारै सम्पन्न अन्य खेलमा मालागाले रायो भालेकानोलाई ३-१ को नतिजामा हरायो भने लेभान्टेले सेभियामाथि १-० को जित हासिल गर्यो।
- लियोनेल मेसीले गोल गर्ने अर्को कीर्तिमान बनाएपनि शनिबार शीर्ष टोली बार्सिलोना स्पेनिस ला लिगाको खेलमा सेल्टा भिगोसँग २-२ को ...){kind=link}