त्यसैगरी उत्तरी अफगानिस्तानमा आतंककारीको आक्रमणमा परी दुई विदेशी सैनिकको मृत्यु भएको जनाइएको छ । यद्यपि अन्तर्राष्ट्रिय सुरक्षा सहयोग बलको नीतिअनुसार ती सैनिकको राष्ट्रियता भने प्रस्ट पारिएको छैन । त्यसैगरी अफगानिस्तानको दक्षिणी भागमा अवस्थित कान्दहार प्रान्तको माइवान्ड जिल्लामा सडक किनारामा राखिएको एक बम विस्फोट हुँदा ५ अमेरिकी सैनिकको मृत्यु भएको थियो । यस मुलुकमा तालिबानले एक साताअगाडि ग्रीष्मकालीन आक्रमणको घोषणा गरेका थिए । अन्तर्राष्ट्रिय सुरक्षा सहयोग बलले जारी गरेको एक विज्ञप्तिमा एक दिनमा नौ नेटोसँग आबद्ध सैनिकको मृत्यु भएको आइतबार जानकारी दिएको छ । यसैबीच कान्दहार प्रान्तका प्रहरी प्रमुख जनरल अब्दुल राजेकले अमेरिकी पाँच सैनिकको उनीहरू चढेको गाडी विस्फोटक पदार्थमा पर्दा मृत्यु भएको बताए । ४ दिन अगाडि छिमेकी हेलमान्ड प्रान्तमा यस्तै आक्रमणमा बेलायतका तीन सैनिकको मृत्यु भएको थियो । अफगानिस्तानमा सन् २००१ देखि अमेरिकी नेतृत्वमा रहेको नेटो सैनिकका विरुद्ध तालिबानी आतंककारीहरूले आक्रमण गर्दै आएका छन् ।सन् २०१४ को अन्त्यसम्ममा अफगानिस्तानबाट नेटो सैनिक फिर्ता भइसक्ने जानकारी नेटो सम्बद्ध राष्ट्रहरुले गत वर्ष नै गरिसकेका छन् । अफगानिस्तानमा तालिवानी आतंककारीहरूले अफगान नेटोसाग आबद्ध सैनिकलाई लक्ष्य गरी सडक किनारको बम र अन्य विस्फोटक पदार्थ विस्फोट गराउँदा बारम्बार नागरिकको हताहती हुने गरेको पाइन्छ । अफगानिस्तानमा सन् २०१४ को अन्त्यसम्ममा नेटो सैनिक फिर्ता भइसक्ने घोषणा यसअघि नै गरिएको भए पनि अफगानिस्तानको शान्ति सुरक्षामा भने उल्लेखनीय परिवर्तन आएको छैन । अफगानिस्तानमा तालिवानी आतंककारीसँग युद्धरत करिब एक लाख नेटो र अमेरिकी सैनिकहरू रहेका छन् । यसवर्षको सुरुदेखि हालसम्म यस्तै विभिन्न आक्रमणमा ५० भन्दा बढी विदेशी सैनिकको मृत्यु भएको समाचारमा जनाइएको छ ।
