मेला समापन कार्यक्रममा जग्गा तथा आवास विकास संघका उपाध्यक्ष एवं मेला संयोजक ओम राजभण्डारीले ग्राहक र व्यव्ासायीबीचको दूरी मेट्न सफल भएको बताए ।
'व्यवसायी र ग्राहकबीचको विश्वासको कमी थियो,' उनले भने, 'मेलाले धेरै राम्रो वातावरण बनाइदिएको छ ।' घरजग्गा मेलाबाट ग्राहकको विश्वास जित्न धेरै सफल भएको उनको भनाइ थियो । 'मेलामा हाउजिङ र अपार्टमेन्टको बुकिङ उत्साहजनक रूपले बढेको छ,' राजभण्डारीले भने, 'हरेक स्टलमा ग्राहकले छलफल गर्ने, बुझ्ने र खरिद गर्ने क्रम देखियो ।'
संघका अध्यक्ष इच्छाराज तामाङले करिब साढे ३ वर्ष लामो मन्दीपछि घरजग्गा प्रति ग्राहकको चासो बढ्दै गएको बताए । '१ करोड रुपैयाँसम्मको घरजग्गा को आयस्रोत खुलाउन पर्ने व्यवस्था छैन । घर खरिदबिक्रीमा पनि सरकारले राजस्वमा छुट दिएको छ,' उनले भने, 'नीति नियममा सुधार भएकाले व्यवसाय फस्टाउँदै गएको छ ।' घरजग्ग्ाा व्यवसाय धराशायी हुँदा मुलुकको अर्थतन्त्र नै धरापमा परेकाले यो व्यवसाय उत्पादनमूलक उद्योगका रूपमा अगाडि बढेको बताए । उनले घरजग्गा मेलाको चौथो संस्करणमा अन्तर्राष्ट्रिय प्रदर्शनीकर्तालाई समेत ल्याउने बताए । 'यसले अन्तर्राष्ट्रिय प्रदर्शनीकर्तासँग अनुभव साट्न मौका मिल्ने छ,' उनले भने । मेलामा आफूलाई खरिद गर्नेसँगै अन्यलाई सुझाव दिन पनि अवलोकनकर्ता आएको उनले बताए । कान्तिपुर पब्लिकेसनका चिफ कर्पोरेट अफिसर महेश स्वाँरले मेलाको उद्देश्य ग्राहकलाई घरजग्गा सम्बन्धी जानकारी गराउनु रहेकाले त्यो लक्ष्य पूरा
भएको बताए ।
मेलामा घर, अपार्टमेन्ट खरिद गर्नेसँगै निर्माण सामग्री र अन्य सजावटका सामानको मुख्य आकर्षण थियो । हाउजिङसहित बैंक, सवारी साधन, सिमेन्ट, फर्निचर, अनलाइन रियलस्टेट बुकिङ, ट्राभललगायत कम्पनी मेलामा सहभागी थिए । विभिन्न कम्पनीको मूल्य र सुविधा तुलना गर्न र आफैं बनाउँदा आवश्यक सामानको भाउ बुझ्न मेलामा अवलोकनकर्ता आउने क्रम बढेको थियो । यसैगरी मेला अवधिभर घर अपार्टमेन्ट खरिद गर्ने सम्भावित ग्राहक पहिचान गरेर विशेष निमन्त्रणा पनि गरिएको थियो ।बम्पर उपहारको लक्की ड्र बिहीबार
एनएचएलडीए कान्तिपुर घरजग्गा मेलामा एक जना अवलोकनर्तालाई दिइने मेरो सिटी अपार्टमेन्टको लक्की ड्र बिहीबार हुने भएको छ । मेला आयोजकका अनुसार ५० रुपैयाँको टिकट खरिद गरी मेला अवलोकन गर्नेमध्ये एक जनालाई गोला प्रथाबाट मेरो सिटीको अपार्टमेन्ट उपलब्ध गराइने छ । रोयल अर्किड डेभलपर्सले हात्तीवनमा मेरो सिटी निर्माण गरिरहेको छ । सातदोबाटो चोकबाट १ दशमलव २ किलोमिटरको दूरीमा रहेको मेरो सिटीका अपार्टमेन्ट १ वर्षभित्र ग्राहकलाई हस्तान्तरण भइसक्ने कम्पनीले जनाएको छ ।
